Willkommen in Rodau

Rore, e gernbesuchdes, iwweroal vun Wold umgewwenenes Kaff, leit im Graniddgebiet vum närdlische Ourrewold ougefähr 15 km siedwestlisch vun Dibbursch un hot sou rund 520 Oiwohner.
Spuurn vun germanische und reemische Derfschen zeische, dass aach in de vorgschischdlische Zeit unser Gemaggung schun bewount wor.

Gschischdlisch is Rore 's erste Mol im Johr 786 n. Chr. als Mark Roadora erwäänt worn. Schbäder hot sisch nooch alde Urkunne de Noome in Rore in de Bachauwe  (geroded Au) geännerd.
Im Laafe vun de Zeid hot 's Kaff immer wirrer en annern Bsitzer gehadd. De Graf Johonn vun Katzeelleboue hot 1403 die Henn vun Zwingebärsch un 1427 de Stumpf vun Aschboch mim Kaff belehnd, 1522 hot de Londgraf vun Hesse de Balthasar vun Weitolshause, aach Schraudebach genannd, mim Kaff belehnd.
's alde Hofhaus, des wo 1620 gebaud worn is, gitt Zeignis, dass des Kaff schun friehzeidisch in de Geschischt e Roll geschpeeld hot. Vun deere old Ouloach is ner noch 's alde Herrnhaus erhoale.
Bemerkenswerd sin noch e poar Holzfachwerkhaisjen, die wo in de weide Umgeebung Ihresgleische suche dun.

Die Strugduur vum Kaff is gemischd: Londwertschaft un Awweiderwoungemoa. 's Graniddwerk Schorsch Hottes und noch anneren Gewerwebetriewe un Gewerwetreiwende vun veschiedene Brangsche sin do ousässisch.
De Borrem is vorwieschend schweer un soi Beawweidung mühvoll.
Die in de Gemoa widderkehrnde Veonstaldung sin die Kärschweih am letzde Sunndoag im Nouvember, es Ortskernfest, des wo alle zwaa Johr im Summer staddfinne dud sowie alle Johr im September un Oktower Kerb un Oktowerfest.

Seit em 1. Januar 1972 is die Gemoa Rore Stadtdaal vun Bieweraa un wird dorsch de Ordsbeirat veträäre.


Text uff Hochdeitsch Seitenanfang

Wappen von Rodau im Odenwald

Landkreis Darmstadt-Dieburg

Aktuelle Wetterlage

Besucherzähler
Besucher seit
15. Nov. 2001